MÜHASİB KÖMƏKÇİSİ

Mən, Orxan Ağazadə, uzun illər boyu Azərsun Holdinqdə müxtəlif vəzifələrdə işləmiş, karyera yüksəlişi göstərmiş və peşəkar inkişafıma daim önəm vermiş biriyəm. Kassir kimi başladığım iş həyatımda, müdir müavini vəzifəsindən mağaza müdirinə qədər yüksəlməyi bacarmışam. Bu müddət ərzində iş yoldaşlarımın hörmətini qazanmış və işə sadiqlik göstərmişəm.

Azərsun Holdinqdəki uzunmüddətli təcrübəm və karyera yüksəlişim işlədiyim yerə sadiqliyimi və uğura olan həvəsimi göstərməklə yanaşı, mənə fundamental idarəetmə, strateji planlaşdırma, liderlik və komanda işi kimi bacarıqlar qazandırmış və bu bacarıqları aktiv şəkildə tətbiq etməyə imkan vermişdir. Təbii olaraq, işlədiyim bu müddət ərzində müştəri yönümlü düşüncə tərzini dərindən mənimsəmiş və məhsulların yerləşdirilməsi zamanı müştəri davranışlarını analiz etmək bacarığımı da gücləndirmişəm.

Bütün bu uğurlarla yanaşı, yuxarıda sadaladığım bilik və bacarıqların yeni iş sahəsində tam uğurlu olmaq üçün kifayət etməyəcəyini anladığımdan özümü inkişaf etdirməyə və yeni biliklərə yiyələnməyə davamlı səy göstərirəm. Bu məqsədlə qatıldığım 4 aylıq Hazır Mühasib kursunu 2023-cü ilin avqust ayında fərqlənmə nişanı ilə bitirmiş və Azərbaycan Respublikası Auditorlar Palatası tərəfində müvafiq fərqlənmə sertifikatı ilə təltif olunmuşam. Qeyd etdiyim mühasibatlıq təlimində yiyələndiyim debitor və kreditorlarla işləmə, mühasibat əməliyyatlarını 1C proqramına daxil etmə, elektron qaimə-fakturaların tərtibi və maliyyə hesabatlarının hazırlanması kimi bacarıqlar, Azərbaycan Dövlət İqtisad Universitetində aldığım bakalavr təhsili və uzunmüddətli iş təcrübəmlə birlikdə nəzərə alındıqda mənim yeni sahədə - mühasibatlıq və maliyyə sahəsində uğurlu karyera qurmağa hazır olduğumu göstərir.

Qazandığım bu bilik və bacarıqları şəxsi və iş həyatı arasında sağlam balansı, karyera yüksəlişi imkanları olan və rəqabətcil məvacib təklif edən yeni bir şirkətdə dəyərləndirmək və özümü yeni çağırışlarla sınamaq istəyirəm. Prestijli şirkətinizin bu imkanları təklif etmək üçün bütün vasitələrə sahib olması məni gələcək karyeramı məhz sizin şirkətinizdə qurmağa həvəsləndirir.

Bütün bunlarla yanaşı, anlayışlı, məsuliyyətli, disiplinli olmağım kimi şəxsi keyfiyyətlərimi və insanlararası ünsiyyət bacarıqlarımı nəzərə aldıqda təklif etdiyiniz vakansiyada özümü uğurla sübut edəcəyimə və şirkətinizə önəmli töhvə verəcəyimə şübhəm yoxdur.

Sonda qeyd etmək istərdim ki, bu vəzifəyə müraciət etməkdə əsas məqsədim yiyələndiyim bilik və bacarıqları yeni bir sahədə tətbiq etməklə özümü sınamaq və inkişaf etdirməkdir. Buna görə də məvacib və digər maddi mövzularda danışıqlara açıq olduğumu xüsusi olaraq vurğulamaq istərdim.